उंधियो

साधारण (७-८ माणसांसाठी)

साहित्य : 

२०० ग्रॅम रताळी

२०० ग्रॅम सुरण

२०० ग्रॅम कोन 

१५० ग्रॅम वांगी

२०० ग्रॅम लहान बटाटे

१५० ग्रॅम प्रत्येकी तूर व वालपापडी 

 ५ मोठी केळी,जास्त पिकलेली असू नयेत

२ मध्यम जुड्या मेथी

 १ १/२ वाटी तेल

 २ टेबल स्पून भरून ओवा

 १ मोठा नारळ

 १ मोठी कोथिंबीरीची जुडी

 १ वाटी भरून आलं,लसूण,(लसूण पात मिळाली तर उत्तम )हिरव्या मिरच्या यांची पेस्ट

 धणे पूड,जिरे पूड,मीठ 

कृती:

मेथीची मुटकुळी :

मेथी बारीक चिरून घ्यावी, त्यात थोडे गहू पीठ,चणा व तांदूळ पीठ, आलं लसूण मिरची पेस्ट,धणा जिरा पावडर व मीठ घालून थोडे घट्टसर भिजवावे व त्याची मुटकुळी तेलात तळून घ्यावीत.

मसाला :

नारळ,कोथिंबीर,आलं लसूण मिरची पेस्ट,धणा जिरा पावडर व मीठ घालून हा मसाला तयार करावा.

सर्व भाज्या फार बारीक चिरू नयेत. प्रत्येक भाजी मसाला लावून वेगळी ठेवावी. ते अशासाठी कि ज्या भाज्याना शिजायला जास्त वेळ लागतो त्या फोडणीत आधी घालायच्या असतात म्हणून.

मेथीची मुटकुळी

मसाला

सुरण, रताळी, कोन

वांगी, बटाटा, तूर, वालपापडी

केळी

मोठ्या पातेल्यात तेल घालून गरम करावे, तेल चांगले गरम झाले कि त्यात ओवा टाकावा, मग सुरण,रताळी,कोन,बटाटा,तूर,वाल पापडी,वांगी अश्या भाज्या घालाव्यात.भाज्या शिजण्यासाठी थोडे पाणी घातले तरी चालेल.(खरं तर हा उंधियो खूप तेल घालून करायचा असतो पण हल्ली आपण तेलाचा वापर कमी करतो म्हणून पाणी घातले तरी चालते) ह्या भाज्या शिजत आल्या कि मग केळी व मेथीची मुटकुळी घालावीत, थोडा वेळ अजून भाज्या शिजून द्याव्यात.पूर्ण उंधियो व्हायला साधारण १ तास लागतो.

उंधियो शिजतांना

उंधियो  शिजल्यावर

तयार उंधियो

वैशाली काजरेकर